वीरगञ्जको रेशमकोठीमा रहेको एक अपार्टमेन्टमा छापा मारेर प्रहरीले स्रोत नखुलेको २३ किलो भन्दा धेरै सुन बरामद गरेको छ । अहिलेको बजार भाउ अनुसार पक्राउ परेको सुनको मूल्य १८ करोड भन्दा धेरैको हो ।

वीरगन्ज महानगरपालिकाको गणेश अपार्टमेन्टबाट उक्त सुन बरामद भएको जिल्ला प्रहरी कार्यालय पर्साले जनाएको छ ।

एक किलोग्राम तौलका १३ वटा बिस्कुट, ८ किलो ५७६ ग्राम तौल भएको ४६ वटा मझौला बिस्कुट र एक किलो तौल भएको १०० ग्रामका १० वटा सुनका बिस्कुट बरामद गरिएको जिल्ला प्रहरी कार्यालय पर्साकी प्रमुख गंगा पन्तले जानकारी दिइन् ।

छापा पारेको अर्पाटमेन्टबाट २ किलो २६२ ग्राम बराबरको चाँदीको गहना पनि बरामद भएको पन्तको भनाई छ । घटनाबारे थप अनुसन्धान भईरहेको जिल्ला प्रहरी कार्यालयले जनाएको छ ।