जाजरकोट : पहिरोले बस्ती बगाउन थालेपछि जाजरकोटको बारेकोटमा चार सय बढी परिवारका दुई हजार बढी मानिस विस्थापित भएका छन् ।  प्रहरीका अनुसार बारेकोट १ कोट्लीका १२ परिवारका ६० जना, सोही वडाको धौलाकोटका ३२ घरका एक सय २५ जना, वडा नम्बर ४ जिरीका ५१ परिवारका दुई सय १५ जना, गोठगाउँका ७३ घरका तीन सय ७० जना, तल्लो जिरीका ३० घरका एक सय पचास जना, मैनाका ६० घरका तीन सय जना र वडा नम्बर ५ का कालाखोली, तोल्खान, भैलोखानाका एक सय ५० घरका नौ सय जना विस्थापित भएका छन् ।

प्रहरीले संकलन गरेको तथ्यांक अनुसार तीन दिनयता अहिलेसम्म बारेकोटमा चार सय आठ घर विस्थापित भएका छन् । दुई हजार एक सय २० भन्दा बढी मानिस विस्थापित भएको जिल्ला प्रहरी प्रमुख डिएसपी किशोर श्रेष्ठले जानकारी दिएका छन् ।

बारेकोटमा गएको पहिरोले ठूलो धनजनको क्षति पुर्‍याएको छ  । विस्थापितको संख्या अझै बढ्न सक्ने जनाइएको छ । गाउँपालिकाले विस्थापितको विवरण संकलन गरिरहेको छ। बेपत्ताको खोजीमै सबै केन्द्रित भएको र संचार सम्पर्क विच्छेद भएका कारण बालीनाली र पशुचौपायामा भएको क्षतिको विवरण आउन नसकेको डिएसपीले बताए । पहिरोको त्रासले गाउँपालिका अध्यक्ष महेन्द्र शाह, वडाध्यक्ष अजबीर सिह र प्रमुख प्रशासकीय प्रमुख गोविन्द सिंहको परिवार विस्थापित भएको छ ।

अध्यक्ष शाहले आफ्नो परिवार विस्थापित भएर विद्यालयमा बसिरहेको छ तर पनि आफू बेपत्ताको खोजी र विस्थापितको राहत तथा व्यव्थापन‍मा जुटिरहेको बताएका छन् । पानी निरन्तर परिरहेकाले जमिन भासिने र पहिरो जाने क्रम नरोकिँदा बारेकोटका जिरी, तल्लो जिरी , धौलाकोट, मैना, तोलखाना, कालाखोली, भैलोखाना, धुमालगायतका गाउँ नै बग्ने खतरा बढेर गएको गाउँपालिका अध्यक्ष महेन्द्र शाहले बताए ।

पहिरो जाने डरले घर छोडेका स्थानीय विद्यालय, आफन्त, गोठ र सार्वजनिक चौरमा त्रिपाल हालेर बसिरहेका छन् ।  धेरैजससो विस्थापित भगवति आधारभूत विद्यालय, हिमालय माध्यमिक विद्यालय गोठगाउँ, गोरख आधारभूत विद्यालय जिरी लगायतका विद्यालयमा आश्रय लिएर बसेका छन् ।

विस्थापित परिवारलाई खान र बस्नको निकै समस्या परेको छ । विस्थापितलाई  शौचालय र खानेपानीको समेत समस्या परिरहेको छ । ठूलो संख्यामा मानिस विस्थापित भएकाले व्यवस्थापनमा कठिनाई भएको गाउँपालिका अध्यक्ष महेन्द्र शाहले बताए ।

निरन्तर भइरहेको वर्षाका कारण प्रदेश ५ का विभिन्न जिल्लामा थप क्षति पुगेकाे छ । प्रदेशका दाङ, पश्चिम नवलपरासी, गुल्मी, बाँके, अर्घाखाँचीलगायतका जिल्लाहरूमा वर्षा, बाढी, पहिरो र डुबानका कारण थप क्षति पुगेको प्रदेश प्रहरी कार्यालयले जनाएको छ ।
प्रदेश प्रहरी प्रवक्ता एसएसपी राजकुमार बैदवारले क्षतिको पूर्ण विवरण सङ्कलन भइरहेको जनाउँदै उद्धारका लागि जिल्ला जिल्लामा सुरक्षाकर्मीहरूका टोली सक्रिय रहेको बताउनुभयो ।

बबईमा बगेर दम्पती बेपत्ता
नेपालगञ्ज समाचारदाताका अनुसार निरन्तर भइरहेको वर्षाका कारण बाँके र बर्दियाका विभिन्न नदी र साना-ठूला खोलाहरूमा बाढी आएको छ । सो बाढीका कारण धेरै ठाउँमा आवागमन रोकिएको र केही ठाउँमा डुबानसमेत भएको दुवै जिल्लाका जिल्ला विपद व्यवस्थापन समितिहरूले जनाएका छन् ।
बर्दिया जिल्ला विपद व्यवस्थापन समितिका अनुसार लगातारको वर्षाले बर्दिया जिल्लाको बबई नदी लगायत मानखोला र अन्य साना खोलाहरूमा बाढी आएको छ ।
तीमध्ये सबैभन्दा ठूलो बाढी बबई नदीमा आएको जनाउँदै जिल्ला विपद व्यवस्थापन समिति, बर्दियाका संयोजक तथा प्रमुख जिल्ला अधिकारी लीलाधर अधिकारीले बबईमा आएको बाढीमा बगेर ठाकुरबाबा नगरपालिका–४ का एक दम्पती बेपत्ता भएको बताउनुभयो ।

उहाँले बगेर ठाकुरबाबा नगरपालिका–४, बगनाहा गाउँका ३२ वर्षीय जितबहादुर थारू र उहाँकी श्रीमती २६ वर्षीया राजकुमारी थारू बेपत्ता भएको बताउनुभयो ।
सुरक्षा निकायका तालिम प्राप्त गोताखोरलाई परिचालन गरेर ती दुवैको खोजी कार्यलाई तीव्र पारिएको उहाँले बताउनुभयो । प्रहरीका अनुसार बबई नदीको खैलार वनकट्टीघाट नजिकबाट उनीहरू बगेर बेपत्ता भएका हुन् ।

५४ घरपरिवार विस्थापित
तम्घास समाचारदाताका अनुसार गुल्मीमा पहिरोका कारण जोखिममा रहेका स्थानहरूको स्थलगत अध्ययन गर्नका लागि भुगर्भविद्को टोली गुल्मी आउने भएको छ ।
पहिरोका कारण जिल्लाको ईश्मा गाउँपालिका वडा नं १, ४ र ६ नं वडाका १९४ घरपरिवार र मुसिकोट नगरपालिकाका ५४ घरपरिवार विस्थापित छन् । असार १८ गते आएको पहिरोका कारण जोखिम रहेकाले त्यस क्षेत्रमा बस्न योग्य हुने वा नहुने भन्ने बारेको अध्ययनका लागि भूगर्भविद् आउने प्रमुख जिल्ला अधिकारी भरतकुमार शर्माले बताउनुभयो ।
जोखिममा रहेकाहरूलाई स्थानीय विद्यालयमा राखिएको जिल्ला प्रशासन कार्यालय, गुल्मीले जनाएको छ ।
गत वर्ष साउन ७ गते सत्यवती गाउँपालिकाको ठूलोलुम्पेक र लिम्घामा गएको पहिरोका कारण १३ जनाको मृत्यु भएको थियो ।

उच्च जोखिममा भर्थापुर
भैरहवा समाचारदाताका अनुसार नादव नदीमा निरन्तर बाढी बढेपछि रुपन्देहीको लुम्बिनी सांस्कृतिक नगरपालिका–२, मर्चवारमा पर्ने भर्थापुर गाउँ उच्च जोखिममा परेको छ । नदीको बहाव बदलिएपछि स्थानीय खेत र बस्ती क्षेत्रमा डुबान भएको छ ।
आइतबार उक्त क्षेत्रको जमिन थप डुबानमा परेको छ  तर क्षतिको पूर्ण विवरण प्राप्त भइनसकेको जिल्ला प्रशासनले जनाएको छ ।
रुपन्देहीका प्रमुख जिल्ला अधिकारी महादेव पन्थले क्षति हुन नदिन तथा राहत र उद्धारका लागि सुरक्षाकर्मीको टोलीलाई तयारी अवस्थामा राखिएको जानकारी दिनुभयो ।

लाखौँको क्षति
दाङ समाचारदाताका अनुसार अविरल वर्षाका कारण दाङमा लाखौँको क्षति भएको छ । जिल्लाको तुलसीपुर उपमहानगरपालिका वडा नं.–७ का विभिन्न स्थानमा वर्षाले लाखौँको क्षति पुर्याएको उपमहानगरपालिकाले जनाएको छ ।
उपमहानगरपालिका प्रमुख घनश्याम पाण्डेले वडा नं.–७ ग्वार सुधा टोलका प्रज्ज्वल दुलालको दुईतले घरसँगै अनेक संरचनाहरूमा क्षति पुगेको बताउनुभयो । उहाँका अनुसार तुलसीपुर–७ झुमरेटोलका सचिव खिमबहादुर महतरा, कमला भण्डारी लगायतका घरहरू भत्किँदा ठूलो क्षति भएको छ ।
वर्षातका कारण तुलसीपुर–७ कै ज्ञानज्योति टोल फर्साराम पाण्डेको गोठ भत्किँदा करिब पाँच लाख बढी क्षति भएको तुलसीपुर–७ कार्यवाहक अध्यक्ष रामबहादुर जीसीले जानकारी दिनुभयो । त्यस्तै केही विद्यालयका संरचना, बाटो, नाली लगायतका संरचनाहरूमा क्षति पुगेको छ ।

सुस्ता क्षेत्रमा त्रास
परासी समाचारदाताका अनुसार अविरल वर्षाका कारण नारायणी नदीमा पानीको बहाव बढ्दैगएका कारण गण्डक ब्यारेजका तीस वटा ढोका खोलिएको छ ।
नेपाल भारतको बीचको नारायणी नदीमा बनेको गण्डक ब्यारेजका ३६ वटा ढोकामध्ये अहिले ३० वटा ढोका खोलिएको हो । नारायणीमा पानीको मात्रा बढ्दै गएपछि नेपालतर्फको नर्सही र सुस्ता क्षेत्रमा जोखिम बढेको छ ।
पश्चिम नवलपरासीका प्रमुख जिल्ला अधिकारी सागरमणी पाठकले स्थानीयलाई जोखिमविरुद्ध सचेत रहन र सावधान भएर बस्न आग्रह गर्दै स्थानिय सरकारहरूलाई सहयोग र उद्धारमा लाग्न आग्रह गरिएको बताउनुभयो ।

ठाउँठाउँमा पहिरो
देउखुरी समाचारदाताका अनुसार लगातार पानी परेपछि दाङको लमही–कोइलावास हुलाकी सडककोे कालोपत्रे सडकका ठाउँठाउँमा पहिरो जाँदा ठूलो क्षति पुगेको छ । सडकमा पहिरो खसेपछि सडक र नालीहरू बिग्रिएका छन् । उक्त सडकको कालोपत्रे काम यही असार मसान्तसम्म काम सक्नुपर्ने थियो ।
साढे ३३ किलोमिटर सडकमध्ये साढे ३१ किलोमिटर क्षेत्रमा कालोपत्रे गरिसकिएको थियो । ७६ करोडको लागतमा सडक कालोपत्रेको काम थालिएको थियो ।

गढवा गाउँपालिकाका वडा नं. ८ का अध्यक्ष सद्दाम सिद्धिकीले पहाडी क्षेत्रमा निर्माणाधीन सडकमा पहिरो झरेर ठूलो क्षति पुर्याएको जानकारी दिनुभयो । “पहिरो झरेर नाली पुरिएको छ, पहिरोले ढाकेको सडक र नाली सफा गर्न ठेकेदारलाई भनेका छौँ ।”

सडक निर्माण कम्पनी कालिका-कुमार जेभीका साइड इञ्चार्ज राजेन्द्र श्रेष्ठले पहाडी क्षेत्रमा सडक कालोपत्रे र नाली बनाउँदा पानीको झरी र पहिरोले पर्याउने क्षतिलाइ आकलन गर्न नसक्दा ठूलो क्षति पुर्याएको बताउनुभयो । अहिले सडकमा पहिरो पन्छ्याउने काम थालिएको छ ।

विराटनगर । शुक्रबारयताको अविरल वर्षाका कारण आएको बाढी र पहिरोमा परी प्रदेश १ मा १३ जना बेपत्ता भएका छन् । प्रदेश १ प्रहरी कार्यालय विराटनगरका अनुसार पहिरोमा परी ११ जना र बाढीले बगाउँदा २ जना बेपत्ता भएका हुन् ।

आइतबार बिहान करिब २ बजे राति संखुवासभा सिलिचोङ गाउँपालिका– १ को बेसिन्दा भन्ने स्थानमा पहिरोमा परी ११ जना बेपत्ता भएका छन् । बेसिन्दामा ९ वटा घर पहिरोले बगाएको छ । गाउँपालिका अध्यक्ष रामबहादुर राईका अनुसार पहिरोमा पुरिएका तीनजनाको जिवितै उद्धार भएको छ । बेपत्ताको खोजीकार्य जारी छ ।

उद्धारमा खटिएका व्यक्तिको मृत्यु

प्रदेश प्रहरी कार्यालय विराटनगरका प्रवक्ता प्रहरी उपरीक्षक दीपक पोखरेलका अनुसार सिलिचोङको पहिरो गएको स्थानमा स्थानीय मदन राईको मृत्यु भएको छ । पहिरोमा परेकाहरुको उद्धारमा खटिएका राईको बिहान करिब साढे ११ बजेको समयमा मृत्यु भएको हो ।

प्रहरी उपरीक्षक पोखरेलले भने, ‘पहिरो खसेदेखि उनी उद्धारमा खटिएका रहेछन् । उद्धारमा खटिरहेकै समयमा उनको अचानक मृत्यु हुन पुग्यो । उनको मृत्युको कारण खुल्न सकेको छैन । ‘

पहिरोमा ७९ वर्षीय गोवा सिंह राईको घर बगाएको छ । घरसँगै बगेका उनको बायाँ हात र टाउकोमा गम्भीर चोट छ । राईसहित उनकी श्रीमती ६० वर्षीया फूलमाया राई, १४ वर्षीया छोरी भिमसरी राईलाई स्थानीयले जिवितै उद्धार गरेका छन् ।

स्थानीय ६० वर्षीय राममान राईको घर पनि बगाएको छ । उनको श्रीमती ५५ वर्षीया हस्तकुमारी राई, छोरीहरू २१ वर्षीया एन्जीला राई र ११ वर्षीया नम्रता राई बेपत्ता छन् । एन्जिला गर्भवती थिइन् ।

जुद्धबहादुर राईको घर बगाउँदा उनकोे श्रीमती ६५ वर्षीया गोरीमाया राई र छोरी २२ वर्षीया प्रकृती राई बेपत्ता छन् । गोठमा गएका कारण जुद्धबहादुर जोगिएका छन् ।

५२ वर्षिय जुद्धबहादुर राई (माने) र उनकी श्रीमती ४५ वर्षीया उत्तरकुमारी राई घरसँगै बेपत्ता भएका छन् । ७० वर्षीया नजमाया राईको घर पनि बगेको छ । ८४ वर्षीय हर्कराज राई र उनकी श्रीमती ८२ वर्षीया आइतमाया राई बेपत्ता छन् ।

स्थानीय सन्दीप राई र सुभधन राईको घर पुरै बगाएको छ । उनको परिवार भने सम्पर्कमा आएका छन् ।

बाढीले बगाउँदा दुईजना बेपत्ता

आइतबार बिहान सप्तकोशी नदीमा १३ वर्षिय बालक बेपत्ता भएका छन । आइतबार बिहान सप्तकोशीमा बाढीसँगै आएको दाउरा निकाल्न नदीमा पसेका १३ वर्षिय अनिल बस्नेत बेपत्ता भएका हुन ।

सुनसरी बराहक्षेत्र नगरपालिका– ६ बोराबानमा कोशी किनारा स्थित दाउरा खोज्ने क्रममा देवीघाट बस्ने गौवाबहादुर बस्नेतका छोरा अनिल दाउरा निकाल्न खोज्दा नदीले बगाएको थियो ।

शनिबार दिउँसो झापाको भद्रपुरका ३३ वर्षीय पुरुष मेची खोलामा बेपत्ता भएका छन । भद्रपुर नगरपालिका– ३ नाउगाटका राई नुहाउने क्रममा बेपत्ता भएका हुन । तीन स्थानमा बेपत्ता भएका १३ जनाको खोजी कार्य जारी रहेको १ नम्बर प्रदेश प्रहरी कार्यालय विराटनगरले जनाएको छ ।