बझाङमा पहिरोमा परि २० जना वेपत्ता भएका छन् भने १७ घर पुरिएका छन् ।

केरास्युँ गाउँपालिकाको वडा नम्वर ८ मल्लेसीमा गए राति बस्तीमाथिबाट आएको पहिरोले बस्तीका धेरै घर पुरेको जानकारी गाउँपालिकाकी उपाध्यक्ष निशा धामीले दिएकी छन्।

विहान गएको पहिरोमा पुरिएका दुई जनाको शव भेटिएको र केही व्यक्तिहरू अझै सम्पर्कविहीन रहेको स्थानीयले बताएका छन् ।

पहिरोले पशुचौपाया समेत पुरिएको  भनाइ छ।

गाउँपालिका केन्द्रबाट मल्लेसी वस्ती ५ घण्टाको पैदल दुरीमा पर्छ।

उद्धारका लागि प्रहरी, स्वास्थ्यकर्मी र गाउँपालिकाको टोली घटनास्थलतर्फ प्रस्थान गरेको धामीले बताइन्।

उद्धारका लागि प्रदेश र केन्द्रमा अनुरोध गरिएको छ।

सेनाको हेलिकप्टर उद्धारका लागि आउने भन्ने आश्वासन पाइएको उनले बताइन्।

हेलिकप्टर आउने आश्वासन पाएपनि बझाङका प्रमुख जिल्ला अधिकारी कमल राज भण्डारीले कुहिरो लागेकाले हेलिकप्टर आउनसक्ने अवस्था नरहेको जानकारी सेतोपाटीलाई दिएका छन्।

यसैगरी पहिरोले बझाङका थुप्रै स्थानमा सडक र पुल भत्केका छन्।

छिटो उद्धारका लागि नेपाली सेनाको टोली, प्रहरी र स्थानीय तहको टोली घटनास्थलतर्फ पठाइ सकिएको उनले बताए।