जापान नेपाली एकता समाज, टोकियो क्षेत्रीय समितिले आयोजना गरेको १३१ औँ मई दिवसको कार्यक्रमको अवसरमा अनलाइन मार्फत बामपन्थी नेता कृष्णराज पौडेलले दिनुभएको शुभकामना मन्तव्यको सम्पादित अंश)
अध्यक्ष ज्यू,
जापान नेपाली एकता समाज क्षेत्रीय समिति टोकियोले १३१ औँ मई दिवसको कार्यक्रमको जुन आयोजना गर्यो, सर्वप्रथम मैले आयोजक संस्थालाई हार्दिक धन्यवाद दिन चाहन्छु ।
यो कार्यक्रममा जोडिएका संसारभरि छरिएका नेपाली दाजुभाइ दिदीबहिनीहरू र संसारभरका मुक्तिकामी मजदुरहरूप्रति सर्वप्रथम हार्दिक अभिनन्दन गर्न चाहन्छु । मभन्दा पहिले बोल्ने साथीहरूले धेरै कुरा बताइसक्नु भएको छ । यी सबै कुरा दोहोर्याएर नजाऔँ ।
मैले मेरा भनाइ छोटकरीमा के राख्न चाहन्छु भने फेरि पनि संसारभरमा समाजवादी राज्यव्यवस्था ल्याएर मात्रै संसारभरका शोषित, पीडित तथा मुक्तिकामी जनसमुदायलाई मुक्त गर्न सकिन्छ । आज कोरोना भाइरसको महाविपत्ति संसारभरि देखिएको छ । ठूला–ठूला साम्राज्यवादी र पुँजीवादी मुलुकहरूले त्यसको समाधान गर्न सकिरहेका छैनन् । आज त्यही कोरोना भाइरसको महामारीले संसारभरका धेरै मजदुरलाई आफ्नो मजदुरीबाट विमुख बनाएको छ वा उनीहरूलाई बेरोजगार बनाइएको छ । करोडौँ मजदुरहरू अहिले नै बेरोजगार भइसकेका छन् । यो स्थितिमा अहिले के देखियो भने पुँजीवादी मुलुकहरूभन्दा पूर्व समाजवादी मुलुकहरूले कोरोना भाइरसलाई धेरै हदसम्म नियन्त्रण गर्न सफल भएका छन् । पूर्व समाजवादी मुलुकहरू जो आज पुँजीवादमा रूपान्तरण भइसकेका छन्, तै पनि उनीहरूको स्कूलिङ्गले त्यसलाई केही हदसम्म रोक्न सफल भएको देखिन्छ । त्यसरी आज अमेरिका, यूरोपमा जति कोरोना भाइरस फैलिएको छ त्यति पूर्वी समाजवादी देशहरूमा फैलिएको छैन । पूर्व समाजवादी देशहरूले कोरोनाई भाइरसलाई केही न केही रूपमा रोक्न सफल भएका छन् । समाजवादको पूर्व स्कूलिङ्गले केही हदसम्म भएपनि महामारीबाट बचेका छन् । अहिले पनि पुँजीवादमा रूपमान्तरित भइसकेका देशहरूमा पनि समाजवादको अभ्यास र जीवनशैली केही हदसम्म अपनाएका कारणले उनीहरू आफैले यो महामारीलाई रोक्न धेरै सफल भएको देखिएको छ ।
संसारमा अहिले मजदुरहरू सबैभन्दा धेरै दुःख, कष्टमा परेका छन् । नेपाली मजदुरहरू संसारभरि बेरोजगार भएका छन् । उनीहरू आफ्नो देशमा फर्कन चाहन्छन् । हाम्रो देशको सरकारसँग संसारभरि छरिएर रहेका नेपाली मजदुरहरूलाई आफ्नो देशमा फर्काउने र नयाँ ढङ्गबाट व्यवस्थापन गर्ने कुनै योजना छैन । सरकारले मजदुरहरूलाई जुनजुन ठाउँमा छौँ त्यही त्यही ठाउँमा बस भनेर भनिराखेको छ । नेपालको सीमा क्षेत्रमा आएर रोकिएर बसेका नेपालीहरूलाई समेत विभिन्न बहानामा त्यतैको क्बारेनटाइनमा राख्ने र दुःख दिने काम गरिरहेको छ । सरकारले आफ्ना नागरिकहरूलाई आफ्नो देशभित्र फर्काउन सक्ने हैसियतसम्म राख्न सक्दैन । त्यसैले आज नेपाल अरू मुलुकहरूको भरमा बच्नु परिरहेको छ । नेपालले आफ्ना नागरिकहरूलाई मजदुरहरूका रूपमा संसारभरि निर्यात गरेको देखियो । यसरी आज हामी संसारभरमा दुःख पाएका मजदुरहरूमा परिणत भएका छौँ ।
अहिले विश्वभर देखापरेको समस्यालाई समाधान गर्न, संसारभरका मजदुरहरूलाई मुक्त गर्न संसारका मजदुरहरूलाई एकढिक्का पार्नका लागि संसारभरका मजदुरहरू एक हुनुपर्दछ । माक्र्सवाद–लेनिनवाद र माओत्सेतुङ विचारधाराको झण्डालाई उच्च राख्दै, सबै प्रकारका अवसरवादका विरुद्ध सङ्घर्ष गरेर मात्र हामीले विजयको झण्डालाईमाथि उठाउन सक्ने छौँ । संसारभरि छरिएका मजदुरले राजनीतिक अधिकार प्राप्त गरेर सत्ता मजदुर वर्गको हातमा ल्याउनका निम्ति संसारभरिका मजदुरहरूलाई एकजुट बनाएर जानका निम्ति यस प्रकारका कार्यक्रमहरूले महत्वपूर्ण योगदान पुर्याओस्, सहयोग गरोस् र उमङ्ग छरोस् भन्ने शुभकामना व्यक्त गर्दछु । त्यसका साथै दुःख पाएका र आज संसारभरि छरिएर बेरोजगार भएका मजदुरहरू प्रति हार्दिक सहानुभूति राख्दै मेरो सानो मन्तव्य यही अन्त गर्दछु । हस्त धन्यवाद ।
