अखिल नेपाल युवक संघको हालै सम्पन्न राष्ट्रिय परिषद बैठकले भ्रष्टाचार र नागरिकता ऐन संशोधन विधेयक विरुद्ध ‘मेची महाकाली खबरदारी अभियान’ सञ्चालन गर्ने निर्णय गरेको छ । संघले जारी गरेका वक्तव्यमा अभियानका रुट तथा कार्यक्रम सार्वजनिक गरिएको छ ।

अध्यक्ष अनिलकिशोर घिमिरेका अनुसार माघ १५ गते कञ्चनपुरको महेन्द्रनगरबाट सुरु हुने अभियान २९ गते झापाको काँकडभिट्टामा समापन हुनेछ । कार्यक्रम मोटरसाइकल यात्राका साथ गरिनेछ ।

अभियानको रुट तथा कार्यक्रम यस्तो छ,
माघ १५ गते- महेन्द्रनगरमा कार्यक्रमको उद्घाटन, बेलौरीमा जनभेटघाट र कोणसभा, धनगढीमा भेटघाट, अत्तरियामा सांस्कृतिक सभा र बास
१६ गते- लम्की, भुरिगाउँ, नेपालगञ्जमा कोणसभा, जनभेटघाट गर्दै कोहलपुरमा बास
१७ गते- शमसेरगञ्ज, कुसुम, अमेलिया, तुल्सीपुर कायक्रम गर्दै घोराहीमा बास
१८ गते- घोराही पत्रकार भेटघाट, लमही, लालमटियामा कोणसभा, जनभेटघाट गर्दै भालुवाङमा सांस्कृतिक सभा र बास
१९ गते- चन्द्रौटा, गोरुसिङे सभा, प्रचारप्रसार गर्दै चार नम्बर बास
२० गते- चार नम्बर कार्यक्रम, पिपरा, सालझण्डी प्रचारप्रसार गर्दै हरैया भेटघाट र बास
२१ गते- मुर्गिया, नयाँगाउ, बेलबास कोणसभा गर्दै बुटवल कार्यक्रम र बास
२२ गते- सुनवल, परासी, बर्दघाट, कार्यक्रम गर्दै सोह्र नम्बर जनभेटघाट र बास
२३ गते- गैंडाकोट जनभेटघाट, नारायणघाट सांस्कृतिक सभा र टाँडीमा बास
२४ गते- हेटौंडा कोणसभा, प्रचारप्रसार गर्दै सिमरा सांस्कृतिक सभा र बास
२५ गते- निजगढ, चन्द्रनिगाहपुर कार्यक्रम गर्दै रौतहट बास
२६ गते- सर्लाही, महोत्तरी, धनुषा, सिराहा प्रचारप्रचार गर्दै सप्तरी बास
२७ गते- इटहरी, धरान, विराटनगर कार्यक्रम र इटहरी बास
२८ गते- दमक प्रचारप्रचार, बिर्तामोड सांस्कृतिक सभासहित बास
२९ गते- काकडभित्ता प्रचारप्रचार, सभासहित समापन

१८ बुँदे बिशेष प्रस्ताव पारित
राष्ट्रिय परिषदले १८ बुँदे बिशेष प्रस्ताव पनि पारित गरेको छ । बैठक पछि अध्यक्ष अनिलकिशिोर घिमिरेद्वारा जारी वक्तव्यमा भनिएको छ, ‘भारतले नेपालको कालापानी, लिपुलेक लिम्पियाधुरालाई आफ्नो नक्शामा राखेको प्रति घोर निन्दा गर्दै तुरुन्त सच्चाउन माग गरेको छ । अमेरिकी साम्राज्यवाद र त्यसैको कुनियतका साथ इन्डोप्यासिफिक गठबन्धन भएको रइन्डोप्यासिफिक रणनितीकै अगंको रुपमा एमसीसी (मिलिनियम च्यालेन्ज कर्पोरेशन) आएको छ । यसलाई संसदबाट अनुमोदन गर्ने प्रयत्न भएको छ । भारतीयले सार्कलाई कमजोर बनाउन र विमस्टेकलाई अगाडि सारेर त्यसैद्वारा एसियाका मुलुकहरुमा प्रभुत्व जमाउने रणनीति ल्याएको छ ।’

यसैगरी राष्ट्रियता, युवा अधिकार, युवाहरुको दायित्व, भ्रष्टाचारको अन्त्य, संघीयताको बिरोध, राष्ट्रघाती नागरिकता नीतिको बिरोध,स्थानीय निकायको अधिकार र पारदर्शिता, सार्बजनिक जग्गा अतिक्रमणको बिरोध, सर्बसुलभ शिक्षाको माग, मौलिक अधिकारहरुको ग्यारेन्टी , समाजबादी कार्यक्रमको लागी दबाब दिने लगायतका बिशेष प्रस्ताबहरु पारित गरिएको छ ।

यस्तै, परिषद बैठकले राष्ट्रिय जनमोर्चाले फागुनमा सञ्चालन गर्ने बिशेष अभियान, अखिल (छैठौं) ले आयोजना गरेको काठमाडौं केन्द्रित कार्यक्रम लगाएत अन्य जनवर्गीय संगठनले आयोजना गरेका कार्यक्रमहरुलाई सहयोग गर्ने निर्णय गरेको छ । संगठनले बैशाख महिनामा नवयुवा गर्जन प्रकाशन गर्ने र जेष्ठ महिनाम बिशेष संगठनात्मक अभियान सञ्चालन गर्ने निर्णय पनि गरेको छ ।

युवक संघको राष्ट्रिय परिषद अगाडि बसेको केन्द्रीय समितिको बैठकले रिक्त रहेका स्थायी परिषद सदस्यहरुमा पदपुर्ति गरेको छ । जसमा कुबेर भण्डारी (प्यूठान), टिकाराम आचार्य (प्यूठान), दशरथ सुबेदी (कञ्चनपूर), लोकबहादुर छत्याल (डडेलधुरा), अनिल गिरी (बाग्लुङ), बिरबहादुर केसी (प्यूठान), हरि सर्तुङी (गुल्मी), (विकाश भूसाल (काठमाडौं) र कृष्ण बिक (कैलाली) रहनुभएको छ ।

युवक संघको सातौं राष्ट्रिय सम्मेलन पछिको पहिलो राष्ट्रिय परिषद् बैठक यही पौष ७ र ८ गते धनगढीमा सम्पन्न भएको हो ।